新工同舊工返工地點一樣，已經大致摸熟地形，雖然食飯仍是最傷腦筋的問題。而且同事們好像真的不太喜歡出外午膳，所以近來迷上了到公司附近的某茶餐廳打躉的習慣。
今天食完飯回公司途中，竟然睇見平時擺開地攤的文具店門口有箱二手小說賣，而且還是至愛《銀河英雄傳說》第一次台版！想當年推出一個月出四本，追看的瘋狂程度有如小學追看薄裝漫畫一樣，經常要走到信和一代問新一集出o左未？
田中芳樹的作品我只看過這套，其他作品雖然想睇，但對於他們的翻譯實在不太讚賞，講真錯漏幾多，不過反正睇中文都估到佢地譯錯乜，都冇乜所謂啦。見阿店主出售的套二手書，拎起手都幾新，5蚊本真係幾抵，諗返起當年買一手幾貴啊，仲要咁多錯添，真係~~~
今日返到屋企又再拎返套《銀英傳》DVD出唻，睇返楊威利同羅嚴塔爾死果兩集，依然感動，最佳的專制政治 vs 最腐敗民主政治，依然是一個未知勝負的戰鬥啊。
鄭中基的搞笑形象一直不是我杯茶，講真佢真係幾樣衰，而且不喜歡他的形象。可能因為我的偏見，上天懲罰我，叫我錯失了看《美女廚房》有史以來最好看的 Fiona 雞手鴨腳負分大作戰。
想不到香港抄襲外國遊戲節目多年，終於懂得去蕪存菁，將自己有特色的強項融會貫通，製作出一個如此有趣味的節目。女人識煮飯係中國現代男人一個幾錯誤的偏見，務必煮得好食更加錯得厲害，不過看著一班貌美如「花」的女藝人一個個煮o野的狼狽相，加上你以為整鬼人地，人地同時整鬼你的試食主持的難受樣，雙重娛樂！
鄭中基，我要對你改觀！不過我仲係唔會中意睇你既戲！
由鄭融出道就好鍾意佢
